Лас-Вегасда АҚШ тарихидаги энг даҳшатли отишма рўй берди
Номаълум кимса Лас-Вегасдаги Mandalay Bay қиморхонаси ёнида ўтказилаётган кантри мусиқа фестивалига келганларга қарата ўт очган. Маҳаллий шерифнинг сўзларига кўра, 50 дан зиёд киши ҳалок бўлган, яна 200 нафарга яқини яраланган. Ўт очган шахс махсус амалиёт давомида ўлдирилган,– деб хабар беради Би-би-си.
Аввалроқ ҳужум оқибатида 20 нафар киши ўлганлиги ва 100 га яқини ярадор бўлганлиги айтилганди. Охирги маълумотларга кўра, Лас-Вегасдаги хунрезлик, қурбонлар сонига кўра, АҚШ тарихидаги энг йирик отишма бўлди.
Полиция тарқатган охирги маълумотларга қараганда, ўт очган киши Лас-вегаслик 64 ёшли фуқаро Стефан Паддок бўлган. У олдинлари ҳуқуқни ҳимоя қилиш органлари эътиборини тортмаган. Паддок кантри-фестивалга келганларга қарата Mandalay Bay меҳмонхонасининг 32- қаватидан ўқ отган.
Маҳаллий ОАВ, шоҳидлар сўзларига таяниб, ўқ тинимсиз узилганлигини айтади. “Обойма кетидан обойма – ўқлар ҳар томонга учарди”,– рўй берган воқеа гувоҳларидан бирининг сўзини келтиради матбуот. Баъзи шоҳидлар сўзларига кўра, 30 ёки 40 та обоймани бўшатган, бу мингтача ўқ дегани. Бошқа гувоҳлар кичикроқ рақамларни келтирадилар, лекин юздан зиёд ўқ узилганлигини айтадилар.
Ахборот агентликларига кўра, воқеа жойига полиция етиб келгач, 32-қаватдан уларга қарата ҳам ўқ узилган. Полиция қиморхона олдида штаб тузган ва махсус амалиётни бошлаган.
Ўт очган киши воқеа жойида отиб ўлдирилган. Полиция берган маълумотга кўра, у бир ўзи бўлган. Шундай бўлса ҳам, полиция ҳозирда Мэрилу Данли исмли аёлни изламоқда – Паддок отишма бошланишидан олдин у билан бирга бўлганлигини кўришган.
